कृषी विभागाचा शेतकऱ्यांना हवामान आधारित कृषी सल्ला : स्थानिक वातावरणाचा अंदाज घेऊन मशागतीचे कामे करण्याचे कृषी विभागाचे आवाहन

कृषी विभागाचा शेतकऱ्यांना हवामान आधारित कृषी सल्ला

स्थानिक वातावरणाचा अंदाज घेऊन मशागतीचे कामे करण्याचे कृषी विभागाचे आवाहन

चंद्रपूर,दि.5 ऑगस्ट: जिल्ह्यातील शेतकऱ्यांनी स्थानिक वातावरणाचा अंदाज घेऊन आणि जमिनीच्या मगदुरानुसार तूर, कपाशी इत्यादी पिकांमध्ये आंतरमशागतीची कामे जसे खुरपणी आणि डवरणी, शिफारशीनुसार तणनाशकाची फवारणी करावी, असे आवाहन जिल्हा अधीक्षक कृषी अधिकारी डॉ.उदय पाटील यांनी केले आहे.

◼️ हा आहे हवामान आधारित कृषी सल्ला:

◼️धान रोपे पुर्नलागवड:

धान पिकात तणाच्या नियंत्रणासाठी रोवणीनंतर 5-6 दिवसात 3.75 लिटर बुटाक्लोरा+ 500 लिटर पाणी (75 मिली+ 10 लिटर पाणी) प्रती हेक्टरी या प्रमाणात वापरावे. रोवणीनंतर 10 ते 15 दिवसांनी तणाच्या नियंत्रणासाठी नॉमिनी गोल्ड (बीस पायरी बँक 10% एससी) 6-7 मिली प्रती 10 लिटर पाण्यात मिसळून फवारणी करावी.

रोवणीनंतर 25 दिवसानी तणाच्या नियंत्रणासाठी सिगमेंट (अझीमसल्फुरोन 50 टक्के डीएफ) 2-3 ग्रॅम किंवा कमांड (कलोम्यझोन 50 टक्के ईसी) 16 ते 20 मिली प्रति 10 लिटर पाण्यात मिसळून फवारणी करावी. पुर्नलागवड झालेल्या धान पिकाची वाढीच्या प्राथमिक अवस्थेत 2 ते 3 सेमी पाण्याची पातळी ठेवावी.

धान रोपवाटीकेवर करपा रोगाचा प्रादुर्भावाची शक्यता असून व्यवस्थापनासाठी कार्बनडान्झीम 50 टक्के डब्लूपी 10 ग्रॅम किंवा म्यान्कॉझेब 75 टक्के प्रवाही यापैकी कोणत्याही एका बुरशी नाशकाची फवारणी 10 लिटर पाण्यात मिसळून लागवडीनंतर 10 दिवसाच्या अंतराने दोन ते तीन फवारण्या कराव्यात.

रोवणीसाठी रोपे काढण्याच्या दोन दिवस आधी वाफ्यातील पाण्याची पातळी थोडी वाढवावी. त्यामुळे मुळे न तुटता रोपे काढण्यास मदत होते. रोपांची लावणी 20 x 15 सेंमी अंतरावर 2 ते 5 सेंमी खोलवर लावावीत. प्रत्येक चुडात 2 ते 3 रोपे सरळ व उथळ ठेवावे.

माती परीक्षण अहवालानुसार चिखलणी करताना 50 किलो स्फुरद (सिंगल सुपर फास्फेट स्वरूपात 313.5 किलो) + 50 किलो पालाश (एमओपी स्वरूपात 83 किलो) नत्रयुक्त खताची निम्मी मात्रा 50 किलो नत्र म्हणजेच (युरिया स्वरूपात 107 किलो) प्रति हेक्टरी बांधीत मिसळावी व बांधीतील पाणी बांधून ठेवावे. जस्त या अन्नद्रव्याची कमतरता असल्यास झिंक सल्फेट 20 किलो प्रती हेक्टरी चिखलावर द्यावे.

◼️सोयाबीन वाढीची अवस्था:

सोयाबीन पिकावर चक्रीभूंगा व खोडमाशी आढळल्यास त्यांच्या नियंत्रणासाठी ट्रायझोफॉस 40 टक्के 12.5 मिली किंवा क्लोराट्रोनिप्रोल 18.5 एससी 3 मिली प्रति 10 लिटर पाण्यात मिसळून फवारणी करावी. सोयाबीन पिकावर तंबाखूची पाने खाणाऱ्या अळ्यांचा प्रादुर्भाव आढळल्यास त्यांच्या नियंत्रणासाठी 5 टक्के निंबोळी अर्काची फवारणी करावी किंवा इंडोक्सीकार्ब 15.8 टक्के एससी 7 मिली प्रति 10 लिटर पाण्यात मिसळून फवारणी करावी.

◼️तूर वाढीच्या अवस्था:

तुर पिकावर पाने गुंडाळणाऱ्या अळीचा प्रादुर्भाव आढळल्यास त्याच्या नियंत्रणासाठी 5 टक्के निंबोळी अर्काची फवारणी करावी. पेरणीनंतर 30 ते 40 दिवसांनी नत्र खताची दुसरी मात्रा ( कोरडवाहू 30 व ओलीत 40 किलो/हे.) जमिनीत भरपूर ओल असतांना देऊन लगेच डवरणी करावी.

◼️तीळ-वाढीची अवस्था:

धान बांधीच्या धुऱ्यावर तीळ पिकातील तणांचे नियंत्रण करण्यासाठी एक किंवा दोनदा निंदणी करून घ्यावी.

◼️भेंडी-वाढीची अवस्था:

भेंडी पिकाकरीता रासायनिक खताच्या मात्रेमध्ये हेक्टरी 50 किलो नत्र 50 किलो स्फुरद दयावे. त्यापैकी अर्धी नत्राची व संपूर्ण स्फुरदाची मात्रा लागवडीच्या वेळी द्यावी तसेच उरलेली नत्राची अर्धी मात्रा लागवडीनंतर 30 दिवसांनी द्यावी. लागवड झालेल्या पिकामध्ये आंतरमशागतीची कामे करावीत.

◼️भाजीपाला- वाढीची अवस्था:

वेलवर्गीय भाजीपाला जसे काकडी, कारली वाल पिकामध्ये फळमाशीच्या निरीक्षणासाठी एकरी दोन कामगंध सापळे लावावेत. रासायनिक तणनाशक व किटकनाशकाची फवारणी पावसाची उघडीप पाहूनच करावी. फवारणी करताना आवश्यक काळजी घ्यावी, असे आवाहन कृषी विभागाने केले आहे.◼️

Leave a Reply

Your email address will not be published. Required fields are marked *