◼️ काव्यरंग :- आराधना…

आराधना…
( अभंग रचना )

प्रथम पूजेचा ! मान गणेशाचा !
इष्ट तो सर्वांचा ! गणराया !!१!!

ओंकार प्रार्थना ! वंदू गजानना !
करू आराधना ! गणेशाची !!२!!

पडता संकटी ! आठवावे रूप !
साठवावे खूप ! मनामध्ये !!३!!

पूजूनी अर्चना ! भाकावी करूणा ! 
आवडे तरूणा ! चिंतामणी !!४!!

सर्वांग सुंदर ! रूप गणेशाचे !
स्मरा नित्य वाचे ! अवघेचि !!५!!

शेंदूर चर्चिला ! कंठी मोती माळ ! 
विशाल ते भाळ ! श्री मोरया !!६!!

बुद्धीचा प्रदाता ! तूच सुखकर्ता ! 
अन् विघ्नहर्ता ! विघ्नेश्वर !!७!!

गणांचा नायक ! तू प्रतिपालक !
सृष्टीचा चालक ! गणपती !!८!!

तेजाचे स्वरूप ! अष्टविनायक !
ज्ञान प्रदायक ! एकदंत !!९!!

म्हणे श्रीगणेश ! नित्यची भजावा ! 
ईश तो पहावा ! सर्वांभूती !!१०!!

Leave a Reply

Your email address will not be published. Required fields are marked *